SERIKALI IHARAKISHE MPANGO WA MATUMIZI BORA YA ARDHI LUDEWA ILI KUEPUSHA MIGOGORO ISIYO YA LAZIMA.

-->

Na Bazil Makungu Ludewa

SERIKALI kupitia Halmashauri ya Wilaya ya Ludewa inatakiwa kuharakisha mpango wa matumizi bora ya ardhi katika maeneo yote yaliyomo ndani na nje ya migodi ili kuepusha migogoro inayoweza kutokea kutokana na ongezeko la watu wanaotarajia kuingia kufuatia machimbo na migodi ya makaa ya mawe ya Mchuchuma na chuma cha Liganga inayotarajia kuanza muda mfupi ujao.

Kauli hiyo imetolewa na Wananchi wa kijiji cha Nindi kata ya Lupingu Ludewa Mkoani Njombe katika kikao cha kuanisha mipaka ya matumizi mbalimbali ya ardhi kijijini hapo iliyopendekezwa na kamati maalum na wataalamu kutoka halmashauri ya wilaya taarifa iliyopokelewa kwa furaha na halmashauri ya kijiji hicho (VC) kabla ya kufikishwa kwenye mkutano wa hadhara wa wananchi wote.

“”” tuna hofu ya kutokea kwa migogoro mikubwa katika maeneo yetu kama serikali itachelewa kukamilisha mpango wa matumizi bora ya ardhi kwa wilaya yote ya Ludewa kwa sababu sisi wenyewe tunagombana wageni wanaokuja kwenye migodi ni wengi, inatakiwa waje wakute ardhi ilishapangiwa matumizi na watu wawe wamepewa hati za kimila.””” alisisitiza mzee Henjewele

Katika kijiji hicho maeneo mbalimbali ndani vitongoji vya Nindi juu, Nindi kati, Njelela na Ipombo yaliainishwa ikiwemo ardhi itakayotumika kwa kilimo, malisho ya mifugo, makazi ya watu, misitu ya hifadhi, vyanzo vya maji, huduma za kijamii na ardhi ya akiba kwa matumizi ya baadaye.

Wananchi kwa upande wao wameishukuru halmashauri ya wilaya ya Ludewa pamoja na timu ya wataalamu kwa kufikisha mpango huo kwa wakati na kwamba kwao ni ukombozi kwa sababu ndugu , jamaa na marafiki wamekuwa wakiishi kwa uhasama kutokana na ugomvi wa ardhi ambao umekuwa ukitokea mara kwa mara na kupoteza muda ambao wangeutumia kwa maendeleo badala yake wamekuwa wakishinda kwenye mahakama kutafuta haki.

Akizungumza katika mkutano huo Afisa ardhi mteule katika halmashauri ya wilaya ya Ludewa Joseph Kamonga alisema kufuatia mpango huo wa matumizi bora ya ardhi serikali itatoa hati miliki za kimila kwa wananchi ambazo huongeza usalama wa miliki kwa sababu hati ni ulinzi uliopo kisheria.

Kamonga alizitaja faida zingine za hati miliki ya kimila kuwa ni pamoja na kupunguza migogoro ya ardhi, hati kutumika kama dhamana ya mikopo na fedha katika taasisi za fedha kama benki ya raslimali, kuongeza thamani ya ardhi, kutumika kama dhamana mahakamani na nu utii na utekelezaji wa sera ya Taifa ya ardhi ya mwaka 1995 na sheria za ardhi.

Kamonga akaongeza kuwa halmashauri ya wilaya ya Ludewa inatekeleza mradi huu kupitia akaunti ya miradi ya maendeleo fedha iliyoidhinishwa na baraza la madiwani kwa ajili ya vijiji vya Iwela katika kata ya Iwela na kijiji cha Nindi katia kata ya Lupingu.

Aidha akaipongeza Mkurabita kwa kugharamia vijiji viwili vya mfano kikiwemo kijiji cha Amani na Lifua pamoja na kutoa mafunzo na kuwajengea uwezo madiwani na wataalamu wa halmashauri ya wilaya ya Ludewa kuhusu mpango wa matumizi bora ya ardhi pia kugharamia na kuleta vifaa mbalimbali vya kupimia ardhi kama GPS kumi (10) na komputa tatu (3) ambavyo vinasaidia kurahisisha kazi.

Akizungumza na gazeti hili katibu wa mbunge wa Ludewa Stanley Gowele alisema mwaka 2014 wafanyakazi 2700 wa kudumu katika migodi wanatarajia kuingia wilayani Ludewa ambapo kati yao 2000 watakuwa kwenye chuma cha Liganga na 700 watakuwa mchuchuma.

Mwaka 2015 wataingia wafanyakazi 3000 kati yao 2000 watakuwa Liganga na 1000 watafanyakazi kwenye mitambo ya kuzalisha umeme mchuchuma, mwaka 2016 Ludewa inatarajia kupokea wafanyakazi 3500 ambapo 1000 watapelekwa mchuchuma na 2500 watakuwa Liganga, mwaka 2017 wafanyakazi wataingia 4500 ambapo mchuchuma watakuwa 1500 na Liganga 3000 na mwaka 2018 Ludewa inatarajia kupokea wageni 7000.

Kwa mujibu wa sensa ya watu na makazi iliyofanyika Agost 2012 wilaya inajumla ya wakazi 128,155 kati yao wanaume ni 60,477 na wanawake 67,678 wastani wa ongezeko la watu kwa mwaka ni 1.6% hadi kufikia 2012 na sasa wilaya ya Ludewa inakadiriwa kuwa na watu 152, 285 kati yao wanawake 79,318 na wanaume ni 72,968 ambapo kiutawala wilaya ya Ludewa imegawanyika katika tarafa 5 kata 25 vijiji vilivyoandikishwa 77 na vitongoji 340.

Wilaya ya Ludewa ina eneo la kilomita za mraba 8,397 kati ya hizo kilomita za mraba 73.54 ni hifadhi ya misitu, kilomita za mraba 2,072 ni maji na milima na kilomita 6,251.46 zinafaa kwa makazi ya watu na kilimo.

mwisho