LUDEWA WAGOMA KUCHANGIA SHUGHULI ZA MAENDELEO KWA KUKOSA RUZUKU YA PEMBEJEO.

                        Na.Bazil Makungu,Ludewa.

WANANCHI wa kata ya Ludewa wilayani Ludewa katika Mkoa wa Njombe wametishia kugoma kushiriki katika shughuli za maendeleo kama watakosa pembejeo ya mwaka huu kufuatia vocha kuletwa chache na ugawaji wa pembejeo hizo kugubikwa na mizengwe ikiwemo upendeleo na vocha hizo kuletwa  chache na kutokutoshereza kwa wakulima.

Mzozo huo ulizuka katika mkutano wa hadhara ulioitishwa maalum jana kwa ajili ya kugawa vocha za ruzuku ya kilimo katika kata ya Ludewa ambapo ilionekana kaya ni nyingi kuliko vocha na kuonekana kuwa wakulima wengi wenye uwezowa kufanyakazi watakosa.

Awali afisa mtendaji wa kijiji cha Ludewa mjini Alfredi Mgimba alisema kuwa uchache wa vocha hizo utasababisha uhasama kati ya wananchi na viongozi wa mitaa na vijiji kwa sababu zimeletwa chache hivyo kushindwa apewe nani na yupi akose.

’’’ kutokana na uchache huo wa vocha za ruzuku ya kilimo ofisi imeamua kuitisha mkutano wa hadhara ili wananchi waamue wenyewe namna bora ya kugawana ili kuondoa manung’uniko hata hivyo tunakusudia kuwaachia wenyeviti wa vitongoji walete majina ya wananchi wenye sifa za kupewa vocha’’’ alisema Mgimba

 Naye Afisa mtendaji wa kata ya Ludewa Bw.Onesmo Haule aliwaambia wananchi kuwa kata ya Ludewa imeleta jumla ya vocha za pembejeo ya kilimo 1061 wakati kata ina jumla ya kaya 2552 zimegawanywa kwa vijiji viwili ambapo kijiji cha Ludewa mjini chenye kaya 1752 kimepewa vocha 650 Kijiji cha Ludewa (K) chenye kaya 800 kimepewa vocha 411.

Baada ya kutoa taarifa hiyo ndipo hasira zilipoibuka kwa wananchi na kuhoji nani atapata na nani atakosa ruzuku hiyo na kwa vigezo vipi na kuilaumu Serikali kwa kuwarubuni kwa sera ya kilimo kwanza wakati sera hiyo haitekelezeki.

Bw.Haule aliwasihi wananchi kutokuwa na jazba kwa tukio hilo na kuahidi kulifuatilia kwa karibu ili kuona kama utatuzi wa adha hiyo ya pembejeo za kilimo utawezekana kama wananchi wengi walivyo tarajia.

Aidha Afisa mtendaji huyo aliitupia lawama Serikali kwa kuwatumia mawakala kusambaza pembejeo hizo badala ya makampuni kama ilivyotarajiwa na wakulima walio wengi ambapo ingeweza kupunguza bei za pembejeo hizo.

Bw.Haule alisema Serikali ilipaswa kupeleka fedha za ruzuku hiyo viwandani na kuyakabidhi makampuni kusambaza kwa wakulima na si mawakala ambao wamekuwa ni tatizo kila mwaka hali ambayo hudhorotesha sekta ya kilimo nchini.

“Tumeshangazwa na mfumo huu ambao tumekuwa tukiupigia kelele  kila mwaka kwani hauna tija kwa wakulima zaidi ya kuwakandamiza wakulima wa hali ya chini kwa kuwaletea vocha chache ili kuuendeleza umaskini nchini zaidi ya kupunguza”,alisema Bw.Haule.

Akizungumza kwa niaba ya wakulima wengine Bw.Alen Msigwa alisema Serikali haina nia ya kuwainua wakulima zaidi ya kuwakandamiza na Sera ya kilimo kwanza haina tija kwa wakulima wa ndani labda wakulima wan je walioko nchini.

Bw.Msigwa alisema wananchi waliahidiwa kupewa pembejeo za ruzuku ikiwapo mbolea ya kupandia mazao na mbegu mapema kabla mvua kuanza kunyesha lakini suala hilo limekuwa kitendawili hasa wilayani Ludewa kwani mbegu na mbolea hizo zimefika wakati wananchi wameshapanda mazao.

Alisema vocha hizo hazitoshi na kunahatari kusababisha mgawanyiko wa wananchi kwani watakaopata vocha hizo ndio watakaochangia shughuri za maendeleo hivyo itawawia vigumu wenyeviti wa mitaa kukusanya michango ya maendeleo kwa wananchi wasiopata vocha.

“huku ni kusababisha matabaka miongoni mwa jamii kwani ni kazi ngumu kuwachagua wakulima kuwa nani apate na naniasipate kutokana na hali hii sasa tunaamini Serikali haina haja ya kutekeleza sera ya kilimo kwanza kwani dalili tunaziona na kama haiwezekani watoe taarifa na si kuwarubuni wananchi”,alisema Bw.Msigwa.

Kutokana na hali hiyo Afisa mtendaji wa kata Bw.Haule aliwataka wenyeviti wa mitaa kukaa na wananchi wa mitaa yao ili kupitisha majina ya watakaopata pembejeo hizo ingawa zimechelewa na hazitoshelezi kulingana na uwingi wa wakulima wa zao la mahindi wilayani Ludewa.

Bw.Haule aliusukumia mzigo huo kwa wenyeviti wa mitaa ambao kwa pamoja walisema wafanyakazi walioajiriwa katika ofisi yoyote hawatapata ruzuku hiyo wakiwemo wakulima wanaojiweza ili kupunguza mgogoro lakini waliosomwa kutopata waliapa kutotoa michango ya maendeleo.

MWISHO.