MIEZI 12 JELA KWA KUINGIA NCHINI BILA KIBALI

WAHAMIAJI haramu 100 kutoka nchi ya Ethiopia wamehukumiwa kutumikia kifungo cha miezi kumi na mbili(12) jela kwa kuingia nchini bila kibali wala paspoti.

Akisoma hukumu hiyo jana hakimu mkazi wa mahakama ya wilaya ya Ludewa katika mkoa wa njombe Fredrick Lukuna alisema kwa kuwa washtakiwa wamekiri kutenda kosa hilo mahakama inawatia hatiani na watatumikia kifungo cha miezi kumi na mbili (12) jela.

Lukuna aliongeza kuwa washtakiwa walitenda kosa hilo chini ya kifungu namba 31(1) na (2) cha sheria ya uhamiaji namba 7 ya mwaka 1995 na kwamba watatumikia kifungo hicho huku wakisubiri taratibu za serikali kuwarejesha nchini kwao.

Awali akisoma hati ya mashtaka mbele ya hakimu mkazi mwendesha mashtaka wa idara ya uhamiaji aliiambia mahakama kuwa Novemba 13 mwaka huu majira ya saa kumi jioni katika kijiji cha Ilela Manda tarafa ya mwambao wa ziwa nyasa bila halali na kwa makusudi washtakiwa waliingia Jamhuri ya muungano wa Tanzania bila kibali wala pasipoti.

Kabla ya kuhukumia jela wahamiaji hao haramu walihukumiwa kulipa faini ya shilingi elfu kumi kila mmoja(10,000) lakini wakashindwa na ndipo hakimu akawatia hatiani na kuamuru kutumikia kifungo cha mwaka jela kila mmoja huku taratibu za kuwarejesha makwao zikifanyika.

Katika kesi nyingine mahakamani hapo kijana Richard Msemwa (17) mpangwa na mkulima wa kijiji cha Luafyo juu Lugarawa amechapwa viboko 12 matakoni baada ya kupatikana na hatia ya kubaka mtoto mwenye umri wa miaka 12 jina tunalo chini ya kifungu 130.

Aidha kufuatia maadhimisho ya kutimiza miaka 51 ya uhuru wa Tanzania bara wafungwa 6 wa makosa mbalimbali katia gereza la Ibihi wilayani Ludewa wameachiwa huru na msamaha wa rais wa Jamhuri ya muungano wa Tanzania.

Akizungumza na gazeti hili mkuu wa gereza hilo kamishna msaidiza Mwaisabila wa jeshi la magereza alisema wafungwa hao wameachiwa kwa mujibu wa sheria na kwamba hajapata pengo lolote kufuatia kuachiwa kwa msamaha wafungwa hao.

Ni desturi kwa rais wa jamhuri ya muungano wa Tanzania kuwaachia wafungwa wa makosa madogomadogo kwa msamaha Desemba 9 kila mwaka ili kwenda sambamba na sherehe za uhuru.

                               MWISHO