WAJAWAZITO WATEMBEA KM 10 KUFUATA HUDUMA YA AFYA

                   Na Bazil Makungu Ludewa

WANAWAKE  hasa akina mama  wajawazito katika kata ya Luana Wilayani Ludewa katika mkoa wa Njombe wanalazimika kutembea kwa miguu kwa umbali wa zaidi ya kilomita 10 kufuata huduma ya afya katika hospitari ya wilaya ya Ludewa huku wengine wakijifungulia njiani imefahamika. 

Akitoa taarifa ya zahanati hiyo iliyopo katika kijiji cha Luana katika kikao kilichoandaliwa na shirika la Daraja linalofanya utafiti katika idara ya Afya kwa kuwakutanisha watoa huduma katika zahanati za serikali zilizoko pembezoni Afisa mtendaji wa kijiji cha Luana Bw.Ladislaus Morani alisema wananchi wananlazimika kutembea umbali mrefu kufuata huduma katika hospitari ya wilaya ya Ludewa kwa miguu.

‘’’’ wanaoteseka sana ni akina mama wajawazito na watoto ambao huduma yao ya kliniki  haipatikani katika zahanati hiyo inayomilikiwa na kanisa  katoliki jimbo la njombe kama sasa hivi hakuna dawa kabisa wajawazito hutembea kwa miguu km 10, na kwa waliona uwezo husafiri kwa pikipiki (Bodaboda) usafiri ambao ni hatari sana.’’’’ Alisema Morani

Akizungumza katika kikao hicho cha wadau wa Afya kutoka katika zahanati nne za Ludende, Luana,Lihagule na Mkomang’ombe kaimu Mkurugenzi wa shirika la Daraja lenye makao yake makuu mkoani Njombe Simon Mkina alisema shirika lake linafanya kazi ya kutoa msukumo kwa Viongozi na watendaji wa Serikali lengo likiwa kutoa huduma stahiki katika jamii.

Alisema kumekuwa na changamoto kubwa katika sekta ya afya hivyo tafiti inayofanywa na shirika la Daraja imeonesha  kuibua mambo mengi  katia  zahanati na vituo vya afya vilivyoko vijijini kutokana na maeneo mengi kusahaulika katika huduma hizo.

“tumeanza kufanya tafiti katika mikoa miwili ya Iringa na Njombe na matokeo yatakayopatikana katika mikoa hii tunaamini ni ya nchi nzima na baada ya hapo tutatoa taarifa katika Halmashauri husika ili wajirizishe na taarifa yetu na baada ya hapo taarifa hizo zitatolewa katika vyombo mbalimbali vya habari ili kuujulisha umma nini tunakifanya”,alisema Bw.Mkina.

Mkina alisema  mpango huu utafanikiwa ikiwa kila mwananchi na mdau wa Afya ataeleza ukweli kuhusiana na huduma zitolewazo ambapo watahitaji kujua upatikanaji wa dawa,wafanyakazi wa sekta ya afya kama wanakidhi mahitaji,upatikanaji wa maji safi katika zahanati,vyombo vya usafiri kwa wagonjwa na mapungufu katika nyumba za wafanyakazi na motisha zao.

Akifungua kikao hicho Mganga mkuu wa wilaya Ludewa Dakt.Hapines Ndossi alisema  wilaya yake inakabiliwa na changamoto nyingi ambazo utafiti huo utabaini,lakini changamoto kubwa anayokabiliana nayo ni upungufu wa wafanyakazi ambapo wamekuwa wakiacha kazi kutokana na mazingira ya kazi kuwa magumu.

Dr.Ndossi alisema wilaya ya Ludewa inazaidi ya vituo vya Afya 50 ambavyo vinachangamoto ya upungufu wa watumishi na nyumba za kuishi watumishi hali ambayo inawakatisha tama wananchi waliojitolea nguvu zao kuvijenga vituo hivyo.

Kuhusu zahanati ya mishioni ya Luana Dr Ndossi alisema kuwa mkataba kati ya serikali na mmiliki wa zahanati hiyo umeshaandaliwa kinachosubiriwa ni kutiliana saini kati ya serikali na mmiliki kupitia mpango wa Public Private Partinership (PPP).

Naye diwani wa kata ya Luana Thomaso Haule akaliambia gazeti hili kuwa kutokana na kero inayowakabili wananchi tayari tofali zaidi ya laki moja zimeshachomwa kwa ajili ya ujenzi wa zahanati ya serikali na kwamba wananchi wanatarajia kuanza ujenzi mwezi mei mwaka huu mvua zitakapopungua.

Alisema Halmashauri ya wilaya inampango wa kutekeleza sera ya Serikali ambayo imelenga kujenga zahanati kwa kila kijiji ili kupunguza vifo vya akina mama wajawazito vinavyotokana na kusafiri umbali mrefu kwa ajili ya kutafuta huduma ya Afya.

Mwisho.