LUDEWA WAOGOPA KUINGIZA UMEME MAJUMBANI KWA HOFU YA UCHAWI NA USHIRIKINA.

          Na Bazil Makungu Ludewa

MKUU wa Wilaya ya Ludewa katika Mkoa wa Njombe Juma Madaha amekemea vikali pepo mbaya wa uchawi na ushirikina vinavyoendelea kuandama wananchi wa Ludewa kijijini na kupelekea watu kuogopa kutangulia kuingiza umeme majumbani mwao kwa hofu ya kugeuzwa kafara.

Mkuu wa wilaya ya Ludewa akiwa na kamati ya ulinzi na usalama ya wilaya, makamu mwenyekiti wa Halmashauri ya wilaya  Monica Mchiro ambaye pia ni diwani wa kata ya Ludewa na wakuu wa idara mbalimbali walikwenda katika kijiji hicho kuhamasisha na kukemea uvumi ulioenezwa na baadhi ya watu kuwa mtu atakayekuwa wa kwanza kuingiza umeme atatolewa kafara ndipo wengine wataanza kuingiza majumbani mwao.

Madaha akawaambia wakazi wa kijiji hicho kuwa serikali haiamini uchawi na kuwataka wale wote wanaojihusisha na mambo ya ushirikina waache mara moja kuwatishia watu wanaohitaji kujiletea maendeleo ya kweli.

’’’’’ kama vitendo vya vitisho vitaendelea kuleta hofu miongoni mwa wananchi, baada ya kilimo kupungua nitafika kijijini hapa na kusimamia upigaji wa kura za siri kuwabaini wachawi na kutengwa kwa kujengewa kijiji chao ili wakaendelee kulogana wenyewe na kupisha maendeleo kwa wenzao.’’’’ Alionya Madaha na kusisitiza

Akitoa taarifa kwa mkuu wa wilaya hiyo meneja wa shirika la umeme tawi la Ludewa Peter Molel alisema serikali imetoa punguzo la uingizaji umeme majumbani na kufikia ghrama ya shilingi 177,000 badala ya shilingi 465,000 zilizokuwa zikitolewa awali.

Alisema pamoja na serikali kutoa ofa hiyo bado kasi ya uingizaji umeme ni ndogo ambapo hadi sasa ni wateja 795 walioingiza na kwamba mitambo na mashine zilizopo zinauwezo wa kufua kilowati 1270 lakini ni kilowati 100 tu ndizo zinazotumika kwa hiyo serikali inaendesha mitambo kwa hasara.

Hofu hiyo imetanda kufuatia historia ya kijiji hicho kuandamwa na matukio mengi ya vifo vya kutatanisha hasa kwa vijana vinavyotokana na mazingira ya ajabu kama kupigwa radi na kufa na baada ya kuzikwa wanaanza kuonekana wakirandaranda mitaani na kuhatarisha usalama.

Erick Kidulile na Romanus Haule wao wakaenda mbali zaidi na kumwambia mkuu wa wilaya kuwa vijana wamechoshwa kunyanyaswa na wachawi sasa hivi watu wanalazimika kulala saa mbili kama kuku kwa hofu kuwa wakitembea wanakutana na majini tena ambao wanajua kuwa walishazikwa.

‘’’’’ Mheshimiwa mkuu wa wilaya tunashukuru kwa kuja kwako, lakini inasikitishwa hivi inawezekanaje mtu aliyekufa na kuzikwa baada ya siku mbili tatu anaonekana akipita mitaani na kwenye nyumba za watu akiomba chakula?’’’’ Aliuliza Erick huku akionekana mwenye majonzi

Stanley Gowele ni katibu wa mbunge wa Ludewa Filikunjombe akitoa salaam za mbunge kwa wananchi wa kijiji cha Ludewa(K) akawatoa hofu wakazi hao na kuwambia kuwa mbunge anawathamini na ndiyo maana amehakikisha umeme unawafikia kwa sababu ni haki yao na kuwataka wautumie umeme huo kwa sababu utachochea kasi ya maendeleo na kuondokana na umaskini wa kipato.

Mradi wa umeme Ludewa mjini ulianza mwaka 2006 na kuwashwa julai 2, 2008 na jumla ya shilingi milioni 233,266,425.60 zimetumika kufikisha umeme katika kijiji cha Ludewa (K) ikiwa ni gharama ya miundombinu ya laini kubwa na ndogo.

mwisho